ដោយៈ ទិន សុខាវុធ
លោក ឡាយ វណ្ណៈ អតីតអភិបាលខេត្តតាកែវ ត្រូវបានតុលាការក្រុងភ្នំពេញចេញសាលក្រមសំរេចអោយជាប់ពន្ធនាគាររយៈពេល ១៣ ឆ្នាំ ចំណែកឯកលោក ឡាយ ណារិទ្ធ អតីតស្នងការរងខេត្តតាកែវ ដែលត្រូវជាបងប្រុសរបស់លោក ឡាយ វណ្ណៈ ក៏ត្រូវបានតុលាការសំរេចអោយជាប់ពន្ធនាគាររយៈពេល ១០ ឆ្នាំ ក្នុងអំពើឃាដកម្មលើស្ត្រីម្នាក់។
លើសពីនេះទៀត យោងតាមសាលក្រមរបស់តុលាការចេញនៅថ្ងៃទី ២ ខែ កញ្ញា ឆ្នាំ ២០១៩ នេះ មនុស្សពីរនាក់ផ្សេងទៀត ដែលជាគ្នីគ្នារបស់លោក ឡាយ វណ្ណៈ ក៏ត្រូវបានតុលាការផ្តន្ទាទោសអោយជាប់ពន្ធនាគារ ២ ឆ្នាំ ម្នាក់ពីបទលាក់បាំងតំរុយក្នុងអំពើឃាដកម្មនេះ។
ក៏ប៉ុន្តែ តុលាការមិនបានបង្គាប់អោយអ្នកទាំង ៤ បង់ប្រាក់នោះទេ ព្រោះដើមបណ្តឹងពុំបានប្តឹងទារសំណងពីជនជាប់ទោសទាំងនោះឡើយ។ នេះបើយោងតាមលោក ធុយ សុគន្ធ ដែលជាមេធាវីការពារក្តីអោយលោក ឡាយ វណ្ណៈ ដែលបានប្រាប់ដល់កាសែតក្នុងស្រុកមួយ។
ជនរងគ្រោះមានឈ្មោះថា ចេវ សុវឌ្ឍនា ត្រូវបានគេអះអាងជាស្រីកំណាន់របស់លោក ឡាយ វណ្ណៈ និងដែលត្រូវគេប្រទះឃើញស្លាប់ ដោយស្ថានភាពចងកក្នុងផ្ទះមួយស្ថិតក្នុងក្រុងដូនកែវ ខេត្តតាកែវ កាលពីខែមករា ឆ្នាំ ២០១៨ កន្លងទៅ។ ក៏ប៉ុន្តែ សមត្ថកិច្ចបានសន្និដ្ឋានថា ការស្លាប់របស់ស្ត្រីរូបនោះ មិនមែនជាការធ្វើអត្តឃាដនោះទេ គឺជាអំពើឃាដកម្ម។ បន្ទាប់មក ជនជាប់ទោសទាំង៤ នាក់ខាងលើត្រូវបានចាប់ខ្លួន៕
No comments:
Post a Comment