 |
| រូបថតៈ វិទ្យុអាស៊ីសេរី |
ដោយៈ ទិន សុខាវុធ
នៅក្នុងសវនការជំនុំជំរះរឿងក្តីជាប់ទាក់ទិននឹងបទចោទប្រកាន់ពីទោសក្បត់ជាតិ កាលពីថ្ងៃព្រហស្បតិ៍ទី ៣០ ខែ មករា ឆ្នាំ ២០២០ កន្លងទៅនេះ លោក កឹម សុខា បានលើកឡើងថា ការចាយវាយត្រឹមត្រូវឬមិនត្រឹមត្រូវរបស់គណបក្សរបស់លោក ក្នុងយុទ្ធនាការបោះឆ្នោត គឺជារឿងរបស់ក្រសួងមហាផ្ទៃ ពីព្រោះការចំណាយរបស់គណបក្សរបស់លោក ត្រូវបានត្រួតពិនិត្យនិងអនុញ្ញាតដោយក្រសួងមហាផ្ទៃ។
យោងតាមកាសែត Khmer Times ការលើកឡើងរបស់លោក កឹម សុខា គឺជាការឆ្លើយតបនឹងសំណួររបស់លោកមេធាវី លី ច័ន្ទតុលា មេធាវីស្មាក្តីរបស់រាជរដ្ឋាភិបាល ដែលបានលើកឡើងពីភាពមិនច្បាស់លាស់ពីរបាយការណ៍ហិរញ្ញវត្ថុស្តីពីការចំណាយមួយដែលមានទឹកប្រាក់រហូតដល់ទៅចំនួន $100,000 ដុល្លារ ហើយដែលគណបក្សរបស់លោក កឹម សុខា បានផ្ញើរទៅក្រសួងមហាផ្ទៃកាលពីឆ្នាំ ២០១២ នៅក្នុងយទ្ធនាការបោះឆ្នោត។
នៅពេលនោះ ប្រតិកម្មទៅនឹងការឆ្លើយតបរបស់លោក កឹម សុខា លោកមេធាវី លី ច័ន្ទតុលា បានសុំអោយក្រុមប្រឹក្សានៃអង្គចៅក្រម (Judge Panel) មិនត្រូវអនុញ្ញាតអោយលោក កឹម សុខា និយាយអ្វីឡើយ នៅក្នុងអង្គជំនុំជំរះ បើគ្មានការអនុញ្ញាត។
ចំណុចសំខាន់មួយទៀតនៅក្នុងអង្គជំនុំជំរះកាលពីថ្ងៃព្រហស្បតិ៍នោះ គឺលោកលោក កឹម សុខា បានលើកឡើងថា សកម្មភាពរប់សលោកជាសកម្មភាពបើកចំហរ គ្មានការលាក់លៀមអ្វីឡើយ ហើយលោកក៏បានរួមប្រាស្រ័យទាក់ទងជាមួយនឹងមេដឹកនាំបរទេសជាច្រើនរូបទៀតដែរ ក្រៅពីសហរដ្ឋអាមេរិក។ ដូចនេះគោលបំណងដ៏សំខាន់របស់លោកនៅក្នុងសកម្មភាពនយោបាយ គឺធ្វើយ៉ាងណាអោយមានការផ្លាស់ប្តូរដោយសន្តិវិធី៕
No comments:
Post a Comment