ភ្នំពេញ៖ មិនមែនជាលើកទីមួយឡើយ ដែលថ្នាក់ដឹកនាំវៀតណាម តែងតែរំឮកដល់ថ្នាក់ដឹកនាំកម្ពុជា ក្នុងការផ្ដល់ភាពស្របច្បាប់ដល់អនិកជនវៀតណាម ដែលកំពុងរស់នៅប្រទេសកម្ពុជា។ ក្នុងជំនួបរវាងថ្នាក់ដឹកនាំប្រទេសទាំងពីររយៈពេលពីរថ្ងៃនោះ កម្ពុជា-វៀតណាម បានឯកភាពគ្នាជាច្រើនចំណុច ដើម្បីពង្រឹងកិច្ចសហប្រតិបត្តិការគ្នាទៅវិញទៅមក។
តាមរយៈសេចក្ដីថ្លែងការណ៍ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី២១ ធ្នូ នាយករដ្ឋមន្ត្រីវៀតណាមលោក ង្វៀន សួនហ្វ៊ុក សង្ឃឹមដូច្នេះថា ៖«កម្ពុជានឹងបន្តចាត់វិធានការសមស្របនានា ក្នុងការធានាសិទ្ធិស្របច្បាប់របស់អនិកជនវៀតណាមនៅកម្ពុជា ដែលត្រូវប្រព្រឹត្តិដោយស្មើភាព ដូចជនបរទេសដទៃទៀត ដែលកំពុងរស់នៅក្នុងប្រទេសកម្ពុជា ស្របតាមច្បាប់និងលិខិតបទដ្ឋានរបស់ប្រទេសកម្ពុជា ដែលនឹងរួមចំណែកដល់ការពង្រឹងនិងពង្រីកមិត្តភាពជាប្រពៃណីរវាងប្រជាជនប្រទេសទាំងពីរ»។
ការលើកឡើងរបស់ថ្នាក់ដឹកនាំវៀតណាមនេះ នៅក្នុងជំនួបជាមួយសម្ដេច ហ៊ុន សែន ដែលបានធ្វើទស្សនកិច្ចនៅវៀតណាម ពីថ្ងៃទី ២០-២១ ធ្នូ ឆ្នាំ២០១៦។
គួរបញ្ជាក់ថា អគ្គនាយកដ្ឋាន អន្តោប្រវេសន៍នៃក្រសួងមហាផ្ទៃ បានរកឃើញថា ជនអន្តោប្រវេសន៍វៀតណាម ដែលកំពុងរស់នៅក្នុងប្រទេសកម្ពុជា មានចំនួន១៦ម៉ឺននាក់ នៅទូទាំងរាជធានី ខេត្ត ។ លទ្ធផលជំរឿនជនអន្តោប្រវេសន៍ដែលធ្វើឡើងចាប់ពីខែមីនា ឆ្នាំ ២០១៥ ដល់ខែសីហា ឆ្នាំ ២០១៦ ដែលប្រកាសឲ្យដឹងដោយ លោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ ៕
ថ្មីៗ
អត្ថបទ : ថ្មីៗ
No comments:
Post a Comment