ភ្នំពេញ: កម្លាំងរក្សាសន្តិភាពផ្នែកវិស្វកម្ម ចំនួន១៨៤នាក់ នឹងត្រូវបញ្ជូន ទៅកាន់ប្រទេសលីបង់ នាដើមឆ្នាំ២០១៧ ខាងមុខនេះ ដែលជាឆ្នាំទី១០ សម្រាប់កម្ពុជាក្នុងសកម្មភាពចាត់បញ្ជូនកម្លាំងរក្សាសន្តិភាពទៅចូលរួមក្នុងបេសកកម្មរបស់អង្គការសហប្រជាជាតិ ទៅកាន់ប្រទេសចំនួន៨ ក្នុងចំនួនកម្លាំងប្រមាណសរុបជិត៤.០០០នាក់។ នេះបើតាមការបញ្ជាក់ឲ្យដឹងរបស់នាយឧត្តមសេនីយ៍ សែម សុវណ្ណនី អនុប្រធានគណៈកម្មការជាតិ អគ្គនាយកមជ្ឈមណ្ឌជាតិរក្សាសន្តិភាព។
លោកបញ្ជាក់ថា កងកម្លាំងយោធាមួកខៀវ ក្នុងកងឯកភាពជំនាញវិស្វកម្ម ចំនួន១៨៤នាក់ ខាងលើនេះ គឺជាកម្លាំងប្តូរវេន កងយោធាមួកខៀវកម្ពុជា ដែលបានបញ្ចប់បេសកកម្ម រយៈពេលមួយឆ្នាំ នៅប្រទេសលីបង់ ដោយគ្រោងនឹងវិលមកកម្ពុជាវិញ នាដើមឆ្នាំខាងមុខនេះដែរ។
លោកឧត្តមសេនីយ៍ទោ ហួត គឹមសាន នាយកសាលាហ្វឹកហ្វឺន កងកម្លាំងរក្សាសន្តិភាពពហុជាតិ បានបញ្ជាក់ថា “កងកម្លាំងវិស្វកម្ម ដែលនឹងចេញទៅ បំពេញបេសកកម្មនេះ គឺមានមកពីបណ្តា កងឯកភាពនានា នៃកងយោធពលខេមរភូមិន្ទ ដែលចំណុះ ក្រសួងការពារជាតិ ចំណុះអគ្គបញ្ជាការដ្ឋាន ចំណុះបញ្ជាការដ្ឋានកងទ័ព ជើងគោក និងចំណុះបញ្ជាការដ្ឋាន កងទ័ពជើងអាកាស” ដោយទទួលបានការហ្វឹកហ្វឺន គ្រប់ជំនាញតាមនិយាមការ របស់អង្គការសហប្រជាជាតិ សំដៅត្រៀមប្តូរវេន នៅប្រទេសលីបង់ និងបណ្តាប្រទេសផ្សេងទៀត។
ក្រៅពីការងារហ្វឹកហ្វឺន ជំនាញយោធា កងយោធាមួកខៀវ តែងតែទទួលបញ្ជ្រប រាល់ការផ្សព្វផ្សាយអប់រំ នូវចំណេះដឹង អំពីច្បាប់នានា ដូចជាច្បាប់គ្រប់គ្រង អាវុធជាតិផ្ទុះ ជាតិនិងអន្តរជាតិ យល់ដឹងពីច្បាប់សិទ្ធិមនុស្ស ច្បាប់សង្គ្រាម ការងារអប់រំចិត្តសាស្ត្រ ភាសាអង់គ្លេស និងព័ត៌មានវិទ្យា ជាដើម។
គួរបញ្ជាក់ថា ចាប់តាំងពីឆ្នាំ២០០៦ រហូតមកដល់ពេលនេះ កម្ពុជាបានបញ្ជូនកម្លាំង សរុបប្រមាណ ៣.៩៦០នាក់ ក្នុងនោះ មានកម្លាំងនារី ចំនួន ១៤៦នាក់ ទៅចូលរួម បេសកកម្ម របស់អង្គការសហប្រជាជាតិ។ បច្ចុប្បន្ន កម្ពុជាមានកម្លាំងចំនួនប្រមាណជិត ១.០០០ នាក់ បាននិងកំពុងបំពេញ បេសកកម្ម នៅប្រទេស ចំនួន៨ រួមមានៈ ប្រទេសស៊ូដង់ ស៊ូដង់ខាងត្បូង អាហ្វ្រិកកណ្តាល ឆាដ សាយប្រឹស ស៊ីរី លីបង់ និងម៉ាលី៕
CEN
ដោយ: មុនីរាជ
No comments:
Post a Comment