កីឡាករ​បាល់ទាត់​ជប៉ុន លោក ហុងដា ខេ​សឺ​កិ បាន​មកដល់​កម្ពុជា​ហើយ ដើម្បី​ផ្ដល់​ក្តី​សុ​បិ​ន្ត​ដល់​កម្ពុជា​

​​ភ្នំពេញ​៖ កីឡាករ​បាល់ទាត់ ហុងដា ខេ​សឺ​កិ (Keisuke Honda) របស់​ក្រុម​ជម្រើសជាតិ​ជប៉ុន ដែល​កំពុង​ប្រកប​អាជីព​នៅ​ក្លិប​បាល់ទាត់ AC Milan របស់​អ៊ីតាលី បានធ្វើ​ដំណើរ​មកដល់​ប្រទេស​កម្ពុជា ដើម្បី​បំពេញ​បេសកម្ម​របស់ខ្លួន​ហើយ កាលពី​ល្ងាច​ថ្ងៃទី ២៤ ខែ​ឆ្នូ ឆ្នាំ​២០១៦​នេះ តាម​ជើង​ជើងហោះហើរ​ត្រង់​ជាប្រចាំ​រវាង​ប្រទេស​កម្ពុជា​និង​ជប៉ុន ដោយ​ក្រុមហ៊ុន​អាកាសចរណ៍ ANA (All Nippon Airways Co., Ltd) ។​

​ក្រុមការងារ​របស់​កីឡាករ ហុងដា បាន​ឲ្យ​ដឹងថា លោក នឹង​ស្នាក់នៅ​ប្រទេស​កម្ពុជា​រយះពេល ៣​ថ្ងៃ ដើម្បី​បំពេញ​បេសកម្ម​របស់លោក​មួយចំនួន​ដូចជា​៖ នៅ​ថ្ងៃទី​២៤ ខែធ្នូ បន្ទាប់ពី​មកដល់​រាជធានី​ភ្នំពេញ លោក ហុងដា បន្តធ្វើ​ដំណើរ​ទៅ​កំសាន្ត​នៅ​ខេត្តសៀមរាប និង​ស្នាក់នៅ​ទីនោះ​មួយ​យប់​។ នៅ​ថ្ងៃទី​២៥ ខែធ្នូ លោក​ត្រលប់មក​ភ្នំពេញ​វិញ ហើយ​នៅពេល​ល្ងាច លោក​នឹង​ទៅ​ចូលរួម​ទស្សនា​ការប្រកួត​បាល់ទាត់ រវាង​ក្រុម​សាលា​បាល់ទាត់​ជាតិ បាទី (U16 ជម្រើសជាតិ​) និង​ក្រុម​សៀមរាប​អង្គ ដែល​ចាប់ផ្តើម​នៅ​ម៉ោង ៦៖៥០ នាទី​ល្ងាច នៅ​ពហុ​កីឡដ្ឋាន​ជាតិ អូឡាំពិក​។ នៅ​ថ្ងៃទី​២៦ ខែធ្នូ លោក ហុងដា នឹង​ចូលជួប​សម្ដែង​ការគួរសម​ជាមួយ​សម្ដេច ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​នៅពេល​រសៀល​ចាប់ផ្ដើម​កម្មវិធី Soccer Camp របស់លោក​នៅ​ពហុ​កីឡដ្ឋាន​ជាតិ អូឡាំពិក​។​

​ចំពោះ​កម្មវិធី Soccer Camp អ្នករៀបចំ​កម្មវិធី​បាន​ឲ្យ​ដឹងថា គឺ​ចាប់ផ្ដើម​នៅវេលា​ម៉ោង​១៣​និង​០០​នាទី​រសៀល​។ នៅ​ម៉ោង​១៤​និង​០០​នាទី​រសៀល Soccer Camp ចាប់ផ្ដើម​ដោយ​លោក ហុងដា ខេ​សឺ​កិ ដើរចូល​ទីលាន ហើយ​នៅ​១៤​និង​១០​នាទី​រសៀល លោក ហុងដា ខេ​សឺ​កិ ឡើង​ថ្លែង​សន្ទរកថា ខណៈ​ម៉ោង​១៤​និង​២០ នាទី​រសៀល​ហ្វឹកហាត់​ជំហាន​ទី ១ កម្ដៅ​សាច់ដុំ (​ចលនា​បឋម​)​។ ចាប់ពី​ម៉ោង ១៤​និង​៤០ នាទី​រសៀល ត្រូវ​ហ្វឹកហាត់​ជំហាន​ទី ២ ការ​បណ្ដើរ​បាល់ ការបញ្ជូន​បាល់​អោយ​គ្នា និង​ការ​គ្រប់​គ្រង់​បាល់ ហើយ​១៥​និង​០០​នាទី​រសៀល​ហ្វឹកហាត់​ជំហាន​ទី ៣ ការ​បំបែក​ជា​ក្រុម​តូចៗ (​ឧ​. ១ vs ១, ៣ vs ៣, ល​)​។​

​ចូលដល់​ម៉ោង​១៥​និង​២០​នាទី​រសៀល ត្រូវ​ហ្វឹកហាត់​ជំហាន​ទី ៤ ហ្គេម ហើយ​២០​នាទី​បន្ទាប់​ពោលគឺ​ម៉ោង ១៥​និង​៤០ នាទី​រសៀល កីឡាករ ហុងដា ចុះហត្ថលេខា និង​ម៉ោង​១៦​និង​០០ នាទី​រសៀល កម្មវិធី Soccer Camp ត្រូវបាន​បញ្ចប់​។ ចំណែក​ម៉ោង​១៧​និង​០០ នាទី​រសៀល​លោក Keisuke Honda ធ្វើ​សន្និសីទកាសែត និង​បង្ហាញ​ពី​ចក្ខុវិស័យ​របស់គាត់​សម្រាប់​ប្រទេស​កម្ពុជា​។​

​ប្រវត្តិ​សង្ខេប​របស់ កីឡាករ ហុងដា ក្នុង​អាជិ​ព​របស់ខ្លួន​

​កីឡាករ ហុងដា ខេ​សឺ​កិ គឺជា​កីឡាករ​ដែលមាន​ដើមកំណើត​មកពី​តំបន់ Settsu ក្នុង​ទីក្រុង Osaka ប្រទេស​ជប៉ុន​។ បច្ចុប្បន្ន​លោក​មាន​វ័យ ៣០ ឆ្នាំ​ហើយ​។ លោក​បានចាប់ផ្ដើម​ប្រែក្លាយ​ខ្លួន​ទៅជា​កីឡាករ​បាល់ទាត់​អាជីព​នៅ​ឆ្នាំ ២០០៥ ជាមួយ​ក្លិប Naogya Grumpus ដែលជា​ក្លិប​នៃ​លី​គ​កំពូល​ជប៉ុន (J-League) ផ្ទាល់​។​

២ ឆ្នាំ​ក្រោយមក ពោលគឺ​នៅ​ឆ្នាំ ២០០៧ លោក​បានធ្វើ​ឲ្យ​ក្តី​សុ​បិ​ន្ត​ក្លាយជា​ការពិត ដោយបាន​ចូលរួម​ជាមួយ​ក្លិប VVV-Venlo នៅ​ប្រទេស​ហូ​ឡង់ និង​បាន​ក្លាយទៅជា​ប្រធាន​ក្រុម​នៅ​ក្រុម​នោះ​ផងដែរ​។ ក្នុងការ​រួមរស់​ជាមួយ​ក្លិប VVV-Venlo ខ្សែបម្រើ​ប្រយុទ្ធ​រូបនេះ​បាន​ទាត់​បាល់​បញ្ចូល​ទី​បាន ២៤ គ្រាប់​ក្នុងការ​បង្ហាញខ្លួន ៦៨ លើក​។​

​រយៈពេល ២ ឆ្នាំ​ក្រោយមក លោក ហុងដា បានធ្វើ​ឲ្យ​ក្តី​សុ​បិ​ន្ត​ក្លាយជា​ការពិត​ទៀត ដោយ​ត្រូវបាន​ក្លិប CSKA Moskow របស់​ប្រទេស​រុស្សី​ចាប់អារម្មណ៍ និង​បាន​នាំ​រូបគេ​ទៅ​ចូលរួម​ជាមួយ​ក្លិប ដោយ​ចុះកិច្ចសន្យា​រយៈពេល ៤ ឆ្នាំ​។ រយៈពេល ៤ ឆ្នាំ​ជាមួយ​ក្លិប CSKA Moskow កីឡាករ ហុងដា បង្ហាញខ្លួន​បាន ៩៤ ប្រកួត​និង​ទាត់​បាល់​បញ្ចូល​ទី​បាន​២០​គ្រាប់​។

​ជាមួយ​ក្តី​សុ​បិ​ន្ត​របស់ខ្លួន ចាប់ពី​ឆ្នាំ ២០១៤ រហូតមកដល់​បច្ចុប្បន្ន​នេះ លោក ហុងដា បាន​កំពុង​រួមរស់​ជាមួយ​ក្លិប​ប្រចាំ​លី​គ​កំពូល​របស់​អ៊ីតាលី គឺ​ក្លិប AC Milan ក្នុងនាម​ជា​ខ្សែបម្រើ​ប្រយុទ្ធ​។ គិត​រហូតមកដល់​ប​ច្ចុ​ប្បន្ន​នេះ លោក ហុងដា បាន​ទាត់​បាល់​បញ្ចូល​ទី​អោយ AC Milan ចំនួន ៨ គ្រាប់​ក្នុងការ​បង្ហាញខ្លួន ៧៨ លើក​។​

​ងាក​មក​ក្រុម​ជម្រើសជាតិ​វិញ ហុងដា ខេ​សឺ​កិ បាន​ជាប់​ជម្រើសជាតិ​ជប៉ុន​ដំបូង​នៅ​ឆ្នាំ ២០០៨ និង​នៅតែ​បន្ត​តំណាងអោយ​ក្រុម​ជម្រើសជាតិ​ជប៉ុន ធ្លាប់ជួយ​ក្រុម​ជម្រើសជាតិ​ខ្លួន ក្នុងការ​ប្រកួត​បាល់ទាត់​ពិភពលោក (FIFA World Cup) ២០១០ និង ២០១៤ ផងដែរ ជាពិសេស​កីឡាករ ហុងដា ក៏​ជា​ផ្នែក​មួយ​ដែល​ជួយ​អោយ​ជម្រើសជាតិ​ជប៉ុន ឈ្នះ​ពានរង្វាន់​ជើងឯក​ប្រចាំ​ទ្វីបអាស៊ី AFC Asain Cup 2011 លើក​ទី ៤ នៅ​ប្រទេស​កាតា​។

​ជាមួយ​ក្រុម​ជម្រើសជាតិ​ជប៉ុន លោក ហុងដា បានបង្ហាញ​ខ្លួន​បាន ចំនួន ៨២ ប្រកួត និង​ទាត់​បាល់​បញ្ចូល​ទី ៣៦ គ្រាប់​។ កីឡាករ​រូបនេះ ក៏​ធ្លាប់​ទាត់​បាល់​បញ្ចូល​ទី​ក្រុម​ជម្រើសជាតិ​កម្ពុជា​ចំនួន ២ គ្រាប់​ផងដែរ នៅក្នុង​ការប្រកួត​ជម្រុះ​បាល់ទាត់​ពិភពលោក FIFA World Cup Qualification Round ប្រចាំ​ទ្វីបអាស៊ី កាលពី​ឆ្នាំ ២០១៥ កន្លងទៅ​។​

​លោក ហុងដា ខេ​សឺ​កិ គឺជា “​អ្នកតស៊ូ​មតិ​ពិភពលោក​សំរាប់​យុវជន​”

​លោក ហុងដា ខេ​សឺ​កិ ជា​សមាជិក​គណៈ​គ្រប់គ្រង​ក្រុមហ៊ុន Honda Estilo Ltd. ត្រូវបានតែងតាំង​ជា “​អ្នកតស៊ូ​មតិ​ពិភពលោក​សំរាប់​យុវជន​” របស់ មូលនិធិ​អង្គការសហប្រជាជាតិ កាលពី​ថ្ងៃ​ពុធ ទី​២២ ខែមិថុនា ឆ្នាំ​២០១៦ នៅ​ទីក្រុង​វ៉ាស៊ីនតោន សហរដ្ឋអាមេរិក​។​

​ពី​ធី​ប្រកាស​នេះ មានការ​អញ្ជើញ​ចូលរួម​ពី​ភ្ញៀវ​កិ​តិ្ត​យស​ជាង​១៥០​នាក់ ដែល​មកពី​វិស័យ​ផ្សេងៗ​គ្នា រួមមាន កីឡា សារព័ត៌មាន និង​ស្ថាប័ន​អភិវឌ្ឍន៍​នានា​ដូចជា មជ្ឈមណ្ឌល​អន្តរជាតិ​សំរាប់​ការស្រាវជ្រាវ​លើ​ស្ត្រី និង​សម្ព័ន្ធ​ធនាគា​ពិភពលោក (International Center for Research on Woman and World Bank Group) មន្ត្រី​រដ្ឋាភិបាល​របស់​ប្រទេស​ជប៉ុន ប្រទេស​អេស្បាញ ប្រទេស​ចូ​ដាន​(Jordan) និង​សហរដ្ឋអាមេរិក ក៏បាន​អញ្ជើញ​ចូលរួម​ក្នុង​កម្ម​វី​ធី​នេះ​ផងដែរ​។

​នៅមុខ​សារព័ត៌មាន​មកពី​៤០​ស្ថាប័ន លោក​បាន​ថ្លែងអំណរគុណ និង​និយាយ​ពីអ្វី​ដែល​មនុស្ស​ទូទៅ​ចាំបាច់​ត្រូវធ្វើ​សម្រាប់​កុមារ​។ ក្នុងឱកាស​នោះដែរ​លោក​បាន​បន្ថែមថា យើង​គួរតែ​ផ្តល់ឱកាស​និង​តំលៃ​ដល់​ផលិតកម្ម​ក្នុងស្រុក សម្រាប់​ការប្រើប្រាស់​ក្នុងស្រុក គឺ​ដើម្បី​ឲ្យ​គុណភាព​ខាង​វិស័យ​អប់រំ​។ ភ្ញៀវ​កិ​តិ្ត​យស​ទាំងឡាយ​មានការ​ភ្ញាក់ផ្អើល និង​រំជួលចិត្ត​ជាខ្លាំង ចំពោះ​ការតស៊ូ​មតិ ដែល​បានលើកឡើង​ដោយ​លោក ហុងដា ខេ​សឺ​កិ ចំពោះ​តួនាទី​ថ្មី​ជា​“​អ្នកតស៊ូ​មតិ​សំរាប់​យុវជន​ជាស​កល​”​។ ភ្ញៀវ​ភាគច្រើន​មានការ​រំភើបចិត្ត ដោយបាន​ស្តាប់លឺ អំពី​ការអភិវឌ្ឍន៍​ជា​និ​រន្ន និង​បេសកម្ម​របស់លោក​ក្នុងការ​ដោះស្រាយ ឬ​សគល់​នៃ​បញ្ហា​ជា​សកល​នេះ​។ សម្រាប់​ការគាំទ្រ​បញ្ហា​ជាស​កល និង​គោលបំណង​ការអភិវឌ្ឍន៍​ជា​និ​រន្ន​របស់​អង្គការសហប្រជាជាតិ តួនាទី​របស់លោក​នឹង​ផ្តោត​សំខាន់​ទៅលើ ការចូលរួម​សកម្មភាព​ក្នុងការ​ប្រឈម​ឧបសគ្គ​ចំបង ដែល​ជួបប្រទះ​ដោយ​យុវជន​នៅ​ជុំវិញ​ពិភពលោក​។ ដូច្នេះហើយ លោក ហុងដា ខេ​សឺ​កិ និង​ក្រុមហ៊ុន Honda Estilo Ltd. អាច​នឹងមាន ឬ​ទទួលបាន​ឱកាស​ជាច្រើន ក្នុងការ​ផ្សារភ្ជាប់​ជាមួយ​ឆាក​អន្តរជាតិ​សំខាន់ៗ ក្នុង​ឆ្នាំ​២០១៦​និង​២០១៧​នេះ​។​

​សាលា​បាល់ទាត់ SOLTILO FAMILIA SOCCER SCHOOL នៅ​ប្រទេស​កម្ពុជា​

​សាលា​បាល់ទាត់ SOLTILO FAMILIA SOCCERSCHOOL គឺជា​សាលា​បង្ហាត់​បាល់ទាត់ ដែល​ស្ថិតនៅក្រោម​ការគ្រប់គ្រង​របស់​ក្រុមហ៊ុន Honda Estilo បង្កើតឡើង​ក្នុង​គោលបំណង​ដើម្បីអោយ​ក្មេងៗ​យល់ថា ក្ដី​សុ​បិ​ន្ត​ពិតជា​មាន​សារៈសំខាន់​សម្រាប់​ពួកគេ ដោយយោង​ទៅតាម​ទស្សន​របស់​កីឡាករ ហុងដា ខេ​សឺ​កិ ក្នុងការ​ចង់ឃើញ​ពូកគេ​ក្លាយជា​កីឡាករ ហុងដា ថ្មី ឬក៏​មាន​សមត្ថភាព​លើសពី ហុងដា នាពេល​អនាគត​។​

​សាលា​បង្ហាត់​បាល់ទាត់ SOLTILO FAMILIA SOCCERSCHOOL នេះ​បាន​បង្កើតឡើង​តាំងពី​ឆ្នាំ ២០១២ តែ​សម្រាប់​នៅ​កម្ពុជា​ទើបតែ​បង្កើត​នៅ​ឆ្នាំ ២០១៦ នេះ​ទេ ពោលគឺ​បាន​បង្កើតឡើង​នៅ​ថ្ងៃទី ១៥ ខែ វិច្ឆិកា ឆ្នាំ ២០១៦ កាលពីពេល​ថ្មីៗ​នេះ និង​បច្ចុប្បន្ន​មាន ២ ទីតាំង​នៅក្នុង​រាជធានី​ភ្នំពេញ ដែល​រួម​មាននៅ​ខណ្ឌទួលគោក ក្នុង​ទីលាន​បាល់ទាត់ Rooy7 Sport Club និង​ទី​តាំងទី​២ នៅក្នុង​ខណ្ឌចំការមន នៅ​ទីលាន​បាល់ទាត់ 3G Mini Football Pitch​។​

​សម្រាប់​គោលបំណង​ធំចំបង​នៃ​កម្មវិធី​មួយ​នេះ គឺ​ចង់​ឲ្យ​ក្មេងៗ​មាន​ក្ដី​សុ​បិ​ន្ត​ដោយ​ចាប់ផ្ដើម​ពីសា​លា​បាល់ទាត់ SOLTILO FAMILIA SOCCERSCHOOL និង​បន្ត​សម្លឹង​រកមើល​ក្មេងៗ​ដែលមាន​ទេពកោសល្យ​ខ្ពស់ ដើម្បី​បន្ត​ឈាន​ក្ដី​ស្រមៃ​របស់​ពួកគេ ឲ្យ​បាន​បន្ត​ឡើង​ទៅដល់​កម្រិត​យុវជន រួមមាន​ចូលរួម​ជាមួយ SOLTILO FC Junior Youths, STFC. Partida, SOLTILO FC Kikugawa, S.T.FC និង SOLTILO FC Youth និង​ចុងក្រោយ​អាច​វិវឌ្ឍន៍​ទៅជា​កីឡាករ​អាជីព​នៅក្នុង​ក្លិប SV Horn ដែលជា​ក្លិប​នៃ​លី​ក​កំពូល​របស់​ប្រទេស​អូទ្រីស​៕

កម្ពុជា​ថ្មី
បូរិន