ភ្នំពេញ៖ យុវជនមួយក្រុមដែលដាក់ឈ្មោះខ្លួនថា «មហាគ្រួសារ» បានរៀបចំអាហារ និងចែកអំណោយជូនដល់អ្នកធាក់ស៊ីក្លូ មនុស្សចាស់ដែលគ្មានទីពឹង និងអ្នកបោសសម្អាតប្រមាណជិត២០០នាក់។ ការរៀបចំអាហារនេះ បានធ្វើឡើងនៅភោជនីយដ្ឋានម៉ាយហ្វេន នាថ្ងៃអាទិត្យ ទី២៥ ធ្នូនេះ។
កម្មវិធីនេះ ជាការរៀបចំដោយក្រុមយុវជនមហាគ្រួសារ ដែលបានអង្គាសថវិកា ពីសប្បុរសជននៅក្នុងហ្វេសប៊ុក រួមទាំងសប្បុរសជនក្នុងនិងក្រៅប្រទេស។ ដំបូងឡើយ ក្រុមអ្នកផ្តួចផ្តើមគំនិតគ្រោងរៀបចំជូនអ្នកធាក់ស៊ីក្លូវ័យចំណាស់ត្រឹមតែ១០០នាក់ប៉ុណ្ណោះ ប៉ុន្តែនៅពេលដែលកម្មវិធីចាប់ផ្ដើម មានអ្នកចូលរួមរហូតដល់ជាង ២០០នាក់។
លោក មីន រតនៈ ជាបុគ្គលិកក្រុមហ៊ុនឯកជនមួយ និងជាសមាជិកក្រុមមហាគ្រួសារ បានប្រាប់សារព័ត៌មានថ្មីៗថា ការរៀបចំអាហារជូនដល់អ្នកធាក់ស៊ីក្លូ មនុស្សចាស់ដែលគ្មានទីពឹង និងអ្នកបោសសម្អាត គឺដោយសារតែមើលឃើញពីការលំបាករបស់ពួកគាត់ ក្នុងការទទួលទានប្រចាំថ្ងៃ។ លោក មីន រតនៈ បានបន្តថា ការរៀបចំនេះ គឺជាចូលរួមស្ម័គ្រចិត្តពីមិត្តភក្តិនៅក្នុងបណ្ដាញសង្គមហ្វេសប៊ុក ដែលកើតចេញពីចិត្តរៀងៗខ្លួន។
សមាជិកក្រុមមហាគ្រួសាររូបនេះ បានប្រាប់ថា ចំពោះថវិកាដែលបានមកពីសប្បុរសជនមានប្រមាណជិត២ពាន់ដុល្លារ និងការជួយឧបត្ថម្ភពីម្ចាស់ហាងម៉ាយហ្វេសផងដែរ។ ម្យ៉ាងទៀត អាហារដែលរៀបចំជូនពួកគាត់ មានចំនួនបួនមុខ រួមទាំងបង្អែម ផ្លៃឈើជាដើម។ ជាមួយគ្នានេះ សម្រាប់ថវិកាទាំងនោះ គឺត្រូវចំណាយក្នុងការរៀបចំអាហារ និងចែកអំណោយជូនដល់ពួកគាត់ ក្នុងមួយនាក់ ១ម៉ឺនរៀលរួមទាំងក្រមា ថ្នាំដុសធ្មេញ និងសាប៊ូជាដើម។
លោក មីន រតនៈ បានបញ្ជាក់ថា៖ «ក្រោយពីកម្មវិធីបានបញ្ចប់ទៅ អ្នកចូលរួមទាំងអស់ដូចជា តាស៊ីក្លូ មនុស្សគ្មានទីពឹង និងអ្នកបោសសម្អាត ពួកគាត់មានអារម្មណ៍សប្បាយរីករាយ និងរំភើបជាខ្លាំង»។ នេះជាការលើកឡើងរបស់លោក មីន រតនៈ។
លោក មីន រតនៈ បានប្រាប់ថា ក្រុមរបស់លោកមានសមាជិកប្រមាណ ៥០នាក់ ដែលរស់នៅទីក្រុងភ្នំពេញ និងនៅតាមខេត្តមួយចំនួន។ ទន្ទឹមនឹងនេះ កម្មវិធីនេះ ចំណាយពេល១ខែ ក្នុងការផ្សព្វផ្សាយជូនដល់អ្នកដែលចង់ចូលរួមការងារសង្គម និងការកសាងបុណ្យកុសលជាដើម។
គួរបញ្ជាក់ថា នេះជាលើកទី២ហើយ ដែលក្រុមរបស់លោកបានធ្វើ ដោយលើកទី១ បានចែកនំប៉័ងជូនដល់ពលករមកពីប្រទេសថៃ និងលើកទី២នេះ រៀបចំអាហារជូនដល់អ្នកធាក់ស៊ីក្លូ មនុស្សចាស់ដែលគ្មានទីពឹង និងអ្នកបោសសម្អាត។ ក្រៅពីកម្មវិធីធំៗបែបនេះ ក្រុមមហាគ្រួសារក៏បានប្រមូលគ្នាជាញឹកញាប់ ដើម្បីចូលរួមបរិច្ចាគឈាមជួយសង្គ្រោះជីវិតមនុស្សផងដែរ៕
ថ្មីៗ
អត្ថបទ : ញឹក ស្រីល័ក្ខ
No comments:
Post a Comment