ភ្នំពេញ: លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលតែងតែចាប់ខ្លួនមន្ត្រីរាជការ កងកម្លាំងប្រដាប់អាវុធ ពាក់ព័ន្ធការប្រព្រឹត្តអំពើពុករលួយ ត្រូវបានមន្ត្រីនគរបាលចរាចរណ៍ផ្លូវគោកនៅគោលដៅផ្លូវ ២០០៤ ចាប់ផាកពិន័យចំនួន ២៥០០០រៀល ដោយសារតែបើករថយន្តអត់ពាក់ខ្សែក្រវ៉ាត់ កាលពីព្រឹកថ្ងៃទី២៤ ខែធ្នូ ឆ្នាំ២០១៦។
លោកទេសរដ្ឋមន្ត្រី ឱម យ៉ិនទៀង បានជិះរថយន្តពាក់ស្លាកលេខ ភ្នំពេញ 2AM-3118 (ឡានព្រូសពណ៌ស្លែ) អត់មានពាក់ខ្សែក្រវាត់ ។
ការអនុវត្តច្បាប់គឺត្រូវអនុវត្តច្បាប់ទាំងអស់គ្នា គឺសូម្បីតែប្រធានអង្គភាពប្រឆាំងអំពើពុករលួយ ក៏នគរបាលចរាចរណ៍ចាប់ផាកពិន័យដែរ ដោយសារគាត់ជិះរថយន្តមិនពាក់ខ្សែក្រវ៉ាត់។
គួរបញ្ជាក់ថា សម្តេចនាយករដ្ឋមន្ត្រី ហ៊ុន សែន ក៏ត្រូវបាននគរបាលចរាចរណ៍ខេត្តកោះកុង ចាប់ផាកពិន័យផងដែរ ដោយសាររតែជិះម៉ូតូអត់ពាក់មួកសុវត្ថិភាព។ នេះសបញ្ជាក់ឲ្យឃើញថា ច្បាប់គឺត្រូវអនុវត្តទៅលើមនុស្សទាំងអស់មិនថា មន្ត្រីតូច ធំ ឬមនុស្សសាមញ្ញនោះទេ ឲ្យតែប្រព្រឹត្តខុស។
សូមជម្រាបថា ចាប់ពីថ្ងៃទី១៥ ខែមីនា ឆ្នាំ២០១៦ មន្ត្រីនគរបាលចរាចរណ៍ផ្លូវគោក ចាប់ផ្តើមធ្វើការត្រួតពិនិត្យរាល់បទល្មើសទាំងអស់ ដែលមានចែងក្នុងច្បាប់ ស្តីពី ចរាចរណ៍ផ្លូវគោក ក្នុងនោះ រួមមានទាំងការត្រួតពិនិត្យលិខិតស្នាម ដូចជា ប័ណ្ណបើកបរ ( ពាក់មី ) ប័ណ្ណសម្គាល់យានយន្ត ( កាត់គ្រី ) វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ( ឈៀក ) និងលិខិតអនុញ្ញាតធ្វើអាជីវកម្មដឹកជញ្ជូន ( ប៉ាតង់ ) ។
CEN
ដោយ: CEN
No comments:
Post a Comment