សហព័ន្ធកីឡាបាល់ទាត់កម្ពុជា (FFC) បានចេញសេចក្តីប្រកាសព័ត៌មានកាលពីថ្ងៃទី១៩ ខែធ្នូ ឆ្នាំ២០១៦ ដើម្បីបកស្រាយករណីដែលសហព័ន្ធកីឡាបាល់ទាត់អាស៊ី (AFC) ពិន័យចំពោះ FFC និងមន្ត្រីរបស់ខ្លួនលើបទក្លែងបន្លំឯកសារ។
កាលពីថ្ងៃទី១៥ ខែធ្នូ គណៈកម្មការវិន័យរបស់សហព័ន្ធកីឡាបាល់ទាត់អាស៊ី (AFC) បានជួបប្រជុំគ្នានៅទីក្រុងគូឡាឡាំពួរ ហើយចេញសេចក្តីសម្រេចលើការដាក់ពិន័យសហព័ន្ធ មន្ត្រី និងអ្នកពាក់ព័ន្ធ ដែលក្នុងនោះ មានសហព័ន្ធកីឡាបាល់ទាត់កម្ពុជា និងមន្ត្រីម្នាក់ខ្លួនផងដែរ។ តាមសេចក្តីសម្រេច AFC បានពិន័យ FFC ជាទឹកប្រាក់១ម៉ឺនដុល្លារអាមេរិក និងលោក គល់ សុភារម្យ មន្ត្រីរដ្ឋបាល ចំនួន៥០០០ដុល្លារអាមេរិក រួមទាំងហាមមិនឲ្យមានសកម្មភាពក្នុងកីឡាបាល់ទាត់រយៈពេល១២ខែ ពីបទក្លែងបន្លំឯកសារដោយរំលោភលើច្បាប់ AFC។
ទាក់ទងនឹងករណីនេះ លោក ម៉ែ តុលា អ្នកនាំពាក្យសហព័ន្ធកីឡាបាល់ទាត់កម្ពុជា បានចេញឃ្លីបវីដេអូខ្លីមួយដើម្បីបកស្រាយបញ្ជាក់ថា ការចោទប្រកាន់របស់ AFC ពាក់ព័ន្ធនឹងការចុះឈ្មោះកីឡាករនីហ្សេរីយ៉ាម្នាក់សម្រាប់ក្លិបណាហ្គាវើល នាការប្រកួតវគ្គ Playoff នៃពានរង្វាន់ AFC CUP កន្លងមក។
លោក ម៉ែ តុលា មិនបានបញ្ជាក់ពីឈ្មោះរបស់កីឡាករនីហ្សេរីយ៉ានោះឡើយ តែបើតាមការផ្សាយរបស់កាសែតភ្នំពេញ ប៉ុស្តិ៍ កីឡាករនោះ គឺ George Kelechi ដែលបានលេងបាល់ទាត់នៅកម្ពុជាចាប់ពីឆ្នាំ២០១៤មក ជាមួយក្លិបអាស៊ីអឺរ៉ុប ភ្នំពេញក្រោន មុននឹងផ្ទេរទៅកាន់ណាហ្គាវើល។
អ្នកនាំពាក្យ FFC បានអះអាងថា សហព័ន្ធរបស់លោកបានទទួលលិខិតបញ្ជាក់ការផ្ទេរអន្តរជាតិ ITC (International Transfer Certificate) ពីសហព័ន្ធកីឡាបាល់ទាត់នីហ្សេរីយ៉ា តាំងពីឆ្នាំ២០១៤មកម្ល៉េះ ប៉ុន្តែនៅពេលដែលណាហ្គាវើលបានចុះឈ្មោះកីឡាករនេះក្នុងបញ្ជីសម្រាប់វគ្គ Playoff នៃពានរង្វាន់ AFC CUP មន្ត្រីសហព័ន្ធស្រាវជ្រាវរកឯកសារផ្ទេរមិនឃើញ ទើបសម្រេចធ្វើលិខិតបញ្ជាក់ថ្មីមួយ។ បើតាមលោក ម៉ៃ តុលា នេះហើយជាបញ្ហាដែល FFC និងមន្ត្រីរបស់ខ្លួនទទួលរងការពិន័យ ដោយសារ AFC បដិសេធលិខិតថ្មី និងហាមមិនឲ្យ George Kelechi ចូលក្នុងព្រឹត្តិការណ៍ AFC CUP។
បន្ថែមលើការអះអាងរបស់លោក ម៉ែ តុលា FFC បានទទួលស្គាល់នៅលើសេចក្តីប្រកាសព័ត៌មានរបស់ខ្លួនថា FFC ទទួលខុសត្រូវចំពោះកំហុសឆ្គងនៃមន្ត្រីរបស់ខ្លួន ហើយនឹងចាត់វិធានការណ៍វិន័យតាមបទបញ្ជាផ្ទៃក្នុង FFC ដើម្បីឲ្យសមស្របជាមួយគោលដៅ និងការប្តេជ្ញាចិត្តក្នុងការពង្រឹងប្រសិទ្ធភាព និងគុណភាពវិជ្ជាជីវៈការងារ បម្រើវិស័យបាល់ទាត់ឲ្យកាន់តែប្រសើរ៕
ថ្មីៗ
អត្ថបទ : ថ្មីៗ
No comments:
Post a Comment