ភ្នំពេញ៖ ក្រសួងអប់រំ យុវជន និងកីឡា ប្រកាសជ្រើសរើសសិស្សស្រីក្រោមអាយុ១៨ឆ្នាំ ចូលរួមប្រកួតប្រជែងបច្ចេកវិទ្យាព័ត៌មាន និងគម្រោងធុរកិច្ចអន្តរជាតិក្នុងកម្មវិធី Technovation។ ជាមួយគ្នានេះ ១០ក្រុមចុងក្រោយ ដែលឈ្នះដល់វគ្គផ្ដាច់ព្រ័ត្រ នឹងចូលរួមធ្វើបទបង្ហាញនៅទីក្រុងសាន់ហ្វ្រាន់ស៊ីស្កូ សហរដ្ឋអាមេរិក។ ចំពោះក្រុមជ័យលាភីពីរក្រុមចុងក្រោយ នឹងទទួលរង្វាន់១ម៉ឺនដុល្លារក្នុងមួយក្រុមផងដែរ។
កម្មវិធីប្រកួតប្រជែងនេះ ក្រោមការសហការរវាងក្រសួងអប់រំ យុវជន និងកីឡា ជាមួយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) រៀបចំកម្មវិធីប្រកួតប្រជែងបច្ចេកវិទ្យាព័ត៌មាន និងគម្រោងធុរកិច្ចអន្តរជាតិក្នុងកម្មវិធី Technovation។ កម្មវិធីនេះ ផ្ដល់ឱកាសដល់សិស្សស្រីនៅតាមគ្រឹះស្ថានមធ្យមសិក្សា ដែលមានអាយុក្រោម១៨ឆ្នាំ ដើម្បីចូលរួមប្រកួតប្រជែងថ្នាក់ជាតិក្នុងតំបន់ ដោយធ្វើការបែងចែកទៅតាមក្រុម។
ជាការកត់សម្គាល់កម្មវិធីប្រកួតប្រជែងនេះ នឹងធ្វើការជ្រើសរើស ១០ក្រុមចុងក្រោយ ដែលឈ្នះដល់វគ្គផ្ដាច់ព្រ័ត្រ ដើម្បីចូលរួមធ្វើបទបង្ហាញនៅទីក្រុងសាន់ហ្វ្រាន់ស៊ីស្កូ សហរដ្ឋអាមេរិក។ ក្រុមជ័យលាភីពីរក្រុមចុងក្រោយ នឹងទទួលរង្វាន់១ម៉ឺនដុល្លារក្នុងមួយក្រុម ដែលបានចាប់ដំណើរការអនុវត្តកម្មវិធីបច្ចេកវិទ្យាព័ត៌មានមានក្នុងទូរស័ព្ទ និងធុរកិច្ចរបស់ខ្លួន។
លក្ខខណ្ឌនៃការជ្រើសរើស ជាសិស្សនារីដែលមានអាយុក្រោម១៨ឆ្នាំ ដែលកំពុងសិក្សានៅតាមគ្រឹះស្ថានមធ្យមសិក្សារដ្ឋ និងឯកជន ដោយក្នុងក្រុមនីមួយៗមានសមាជិកពី៣ ទៅ៥នាក់។ ក្រុមសិស្សដែលជ្រើសរើស ត្រូវទទួលការបំប៉នរយៈពេល១២សប្ដាហ៍នៅមជ្ឈមណ្ឌលសហប្រតិបត្តិការកម្ពុជាកូរ៉េ (CKCC) ដោយស្ម័គ្រចិត្ត និងមិនឲ្យប៉ះពាល់ម៉ោងសិក្សា ដោយពុំមានប្រាក់ឧបត្ថម្ភ។
គួរបញ្ជាក់ថា សម្រាប់គ្រឹះស្ថានមធ្យមសិក្សា ត្រូវរៀបចំជ្រើសរើស និងបញ្ជូនបញ្ជីបេក្ខភាពមកនាយកដ្ឋានមធ្យមសិក្សាចំណេះទូទៅ និងតាមអ៊ីម៉ែល soktha@moeys.gov.kh ឲ្យបានមុនថ្ងៃទី៣០ ខែធ្នូ ឆ្នាំ២០១៦។ ជាពិសេសត្រូវសហការជាមួយមាតាបិតាសិស្ស ដើម្បីជួយសម្រួលពេលវេលាបំប៉ននៅរៀងរាល់ចុងសប្ដាហ៍៕
ថ្មីៗ
អត្ថបទ : ញឹក ស្រីល័ក្ខ
No comments:
Post a Comment