ភ្នំពេញ៖ ក្រោយពីបរាជ័យក្នុងការកោះហៅរដ្ឋមន្ត្រីក្រសួងមហាផ្ទៃ សម្ដេច ស ខេង មកសាកសួរករណីឃាតកម្មលោក កែម ឡី នោះលោក អេង ឆៃអ៊ាង គ្រោងបង្វែរការសាកសួរនេះទៅលើរដ្ឋមន្ត្រីក្រសួងយុត្តិធម៌វិញ។
ប្រធានគណៈកម្មការសិទ្ធិមនុស្ស អង្កេតនិងទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង បាននិយាយថា បើទោះជាលោកមិនអាចសួរនាំសម្ដេច ស ខេង ក្តី ប៉ុន្តែលោកក៏អាចសាកសួរទៅលើលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ ដើម្បីទទួលបានព័ត៌មានបន្ថែមជុំវិញករណីឃាតកម្មលោក កែម ឡី នេះ ក្នុងការស្វែងរកភាពយុត្តិធម៌ជូនគ្រួសារជនរងគ្រោះដែរ។
ថ្លែងប្រាប់សារព័ត៌មានថ្មីៗ ប្រធានគណៈកម្មការទី១រូបនេះ បានបញ្ជាក់ដូច្នេះថា៖«យើងមិនបញ្ឈប់ការរកយុត្តិធម៌ជូនលោក កែម ឡី ឡើយ ។ យើងនឹងកោះហៅរដ្ឋមន្ត្រីពាក់ព័ន្ធផ្សេងទៀតមកសួរនាំករណីឃាតកម្មលោក កែម ឡី នេះ គឹលោក អង្គ វង្សវឌ្ឍនា រដ្ឋមន្ត្រីក្រសួងយុត្តិ»។
បើតាមមន្ត្រីជាន់ខ្ពស់គណបក្សសង្គ្រោះជាតិរូបនេះ គណៈកម្មការទី១លោក នឹងប្រជុំពិគ្រោះយោបល់គ្នានៅសប្ដាហ៍ក្រោយនេះ ដើម្បីត្រួតពិនិត្យលើលទ្ធភាពក្នុងការកោះហៅរដ្ឋមន្ត្រីក្រសួងយុត្តិធម៌ នៅដើមឆ្នាំ២០១៧ខាងមុខនេះ។
កាលពីថ្ងៃទី២២ ធ្នូ ប្រធានរដ្ឋសភាសម្ដេច ហេង សំរិន បានច្រានចោលសំណើប្រធានគណៈកម្មការទី១រដ្ឋសភាលោក អេង ឆៃអ៊ាង ដែលកោះហៅរដ្ឋមន្ត្រីក្រសួងមហាផ្ទៃសម្ដេច ស ខេង មកសាកសួរព័ត៌មានបន្ថែមជុំវិញករណីឃាតកម្មលោក កែម ឡី។
តាមរយៈលិខិតរបស់អ្នកនាំពាក្យរដ្ឋសភា បានបញ្ជាក់ថា៖«សម្ដេច ហេង សំរិន ប្រធានរដ្ឋសភា បានសម្រេចមិនបញ្ជូនលិខិតនេះទៅរាជរដ្ឋាភិបាលដើម្បីអញ្ជើញ សម្តេចក្រឡាហោម មកបំភ្លឺទេ ដោយហេតុថា ករណី លោក កែម ឡី នេះបានធ្លាក់ទៅក្នុងសមត្ថកិច្ចរបស់តុលាការតាំងពីដំណាក់កាលដំបូង និងតាំងពីយូរមកហើយ។ ហើយទាំងរដ្ឋសភា និងទាំងរាជរដ្ឋាភិបាល សុទ្ធតែពុំមានសិទ្ធិអ្វីជ្រៀតជ្រែកចូលកិច្ចការរបស់តុលាការឡើយ»៕
ថ្មីៗ
អត្ថបទ : រំដួល ចិត្រា
No comments:
Post a Comment