រដ្ឋមន្ត្រីការបរទេសឥណ្ឌូណេស៊ីលោកស្រី Retno LP Marsudi នឹងបំពេញបេសកម្មពីរថ្ងៃទៅកាន់មីយ៉ាន់ម៉ា និងបង់ក្លាដែស ដើម្បីស្វែងយល់ និងស្វែងរកដំណោះស្រាយលើបញ្ហានៅរដ្ឋ Rakhine ដែលកំពុងតែប្រទាំងប្រទើសខ្លាំងដោយសារតែវិបត្តិជនជាតិភាគតិចម៉ូស្លីមរ៉ូហ៊ីងយ៉ានោះ។
លោកស្រីរដ្ឋមន្ត្រីការបរទេស Retno LP Marsudi នៅថ្ងៃទី១៦ ធ្នូ កន្លងទៅ បានថ្លែងប្រាប់អ្នកសារព័ត៌មានក្នុងហ្សាការតាថា លោកស្រី នឹងចូលរួមកិច្ចប្រជុំក្រៅផ្លូវការមួយជាមួយនឹងសមភាគអាស៊ាននៅថ្ងៃទី១៩ ធ្នូ ក្នុងក្រុងរ៉ងហ្គូននៃប្រទេសមីយ៉ាន់ម៉ា ហើយ លោកស្រី នឹងបន្តដំណើរទៅកាន់ក្រុងដាហ្កា នៃប្រទេសបង់ក្លាដែសដើម្បីជួបពិភាក្សាជាមួយនឹងសមភាគីបង់ក្លាដែសនៅទីនោះ។ នេះបើយោងតាមសារព័ត៌មានឥណ្ឌូនេស៊ី The Jakarta Post។
មុនពេលដែលត្រូវចាកចេញសម្រាប់កិច្ចប្រជុំនោះដែរ ប្រមុខការទូតឥណ្ឌូណេស៊ីរូបនេះ បានបង្ហាញពីក្តីសង្ឃឹមថា រដ្ឋាភិបាលមីយ៉ាន់ម៉ា នឹងផ្តល់ព៌ត៌មានលម្អិតលើការអភិវឌ្ឍរឿងចុងក្រោយនៅក្នុងរដ្ឋ Rakhine។ នេះបើយោងតាមសារព័ត៌មានដដែល ដែលបានដកស្រង់សម្តីលោកស្រីរដ្ឋមន្ត្រីដែរថា លោកស្រី ជឿជាក់ថា ការផ្តល់ព័ត៌មានចុងក្រោយដោយផ្ទាល់ពីទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី គឺជាការចាប់ផ្តើមមួយដ៏ល្អប្រសើរ។
សូមជម្រាបផងដែរថា លោកស្រីទីប្រឹក្សារដ្ឋ និងជារដ្ឋមន្ត្រីការបរទេសមីយ៉ាន់ម៉ា អ៊ុងសាន ស៊ូជី នឹងបើកកិច្ចប្រជុំរដ្ឋមន្ត្រីការបរទេសក្រៅផ្លូវការមួយនៅថ្ងៃទី១៩ ធ្នូ ក្នុងក្រុងរ៉ងហ្គូន ក្នុងគោលដៅចែករំលែកពីព័ត៌មានលម្អិតជាមួយនឹងសមភាគីអាស៊ានលើការអភិវឌ្ឍរបស់ប្រទេសនារយៈពេលចុងក្រោយ និងជាពិសេសនោះលើជម្លោះនៅក្នុងរដ្ឋ Rakhine ដែលកំពុងតែមានចម្រូងចម្រាសខ្លាំងលើបញ្ហាសិទ្ធិមនុស្សពាក់ព័ន្ធនឹងការធ្វើបុកម្នេញទៅលើជនជាតិភាគតិចម៉ូស្លីមរ៉ូហ៊ីងយ៉ា។
កិច្ចប្រជុំនេះដែរ ធ្វើឡើងក្រោយពីមានចលនារបស់ប្រជាជនជនជាតិម៉ូស្លីមដែលមានទាំងនៅឥណ្ឌូនេស៊ី ម៉ាឡេស៊ី និងថៃ បានប្រមូលផ្តុំគ្នាបាតុកម្មដោយសន្តិវិធីដើម្បីទាមទារឲ្យរដ្ឋាភិបាលមីយ៉ាន់ម៉ាដែលកំពុងតែដឹកនាំដោយលោកស្រី ស៊ូជី បញ្ឈប់សកម្មភាពធ្វើទុកបុកម្នេញទៅលើជនជាតិភាគតិចម៉ូស្លីម រ៉ូហ៊ីងយ៉ា នៅក្នុងរដ្ឋ Rakhine ។ សកម្មភាពនេះ ត្រូវបានរដ្ឋាភិបាលមីយ៉ាន់ម៉ា ចាត់ទុកថាជាសកម្មភាពជ្រៀតជ្រែកផ្ទៃក្នុងរបស់ខ្លួន ហើយ ការប្រជុំជាមួយនឹងរដ្ឋមន្ត្រីការបរទេសអាស៊ាននៅថ្ងៃទី១៩ ខែធ្នូខាងមុខនេះ ក៏ជាសារមួយដើម្បីដាស់តឿនដល់មេដឹកអាស៊ានដើម្បីចៀសវាងធ្វើសេចក្តីថ្លែងការណ៍លើបញ្ហានេះដែលអាចប៉ះពាល់ដល់មុខមាត់មីយ៉ាន់ម៉ាផងដែរ៕
ថ្មីៗ
អត្ថបទ : ទេព អ៊ីវិសាល
No comments:
Post a Comment